Valur Vestan

Valur Vestan hét Steingrímur Matthías Sigfússon. Hann kaus að skrifa undir skáldanafninu Valur Vestan þegar hann skrifaði skáldsögur sínar og smásögur. Barnabókina Blíð varstu bernskutíð skrifaði hann undir sínu eigin nafni. Eftir hann liggja mörg falleg tónverk og lagatextar sem hann samdi á ferli sínum. Steingrímur Matthías Sigfússon fæddist 12. júní 1919 á Stóru-Hvalsá í Hrútafirði. Foreldrar hans voru Kristín Gróa Guðmundsdóttir og Sigfús Sigfússon. 
Steingrímur fékk sína fyrstu tónlistarkennslu hjá Ragnhildi Finnsdóttur, dóttir Finns Jónssonar fræðimanns frá Kjörseyri. Á unglingsárum fór Steingrímur á Héraðsskólann að Reykjum í Hrútafirði. Þar kenndi Áskell Jónsson honum tónfræði og hljóðfæraleik. Áskell var faðir Harðar organista í Hallgrímskirkju. Ef Áskell þurfti að fara frá skólanum setti hann Steingrím sem kennara á meðan. 

Eftir nám á Reykjaskóla fór Steingrímur til Reykjavíkur og var einn vetur í píanónámi hjá Aage Lorange. Eftir námið hjá Aage réði Steingrímur sig sem organista til Patreksfjarðar að áeggjan sóknarprestsins Einars Sturlaugssonar. Því fylgdi einnig organistastarfið á Stóra-Laugardal í Tálknafirði. Var hann þá organisti einnig í Sauðlauksdal þar sem Grímur Grímsson var prestur.
Næstur tuttugu ár var Steingrímur á Patreksfirði og nam þar húsamálun og var einnig ritstjóri Patreks, sem var héraðsfréttblað, jafnframt því að vera organisti.
Steingrímur skrifaði einnig spennusögurnar Týndi hellirinn, Flóttinn frá París og Rafmagnsmorðið ásamt nokkrum smásögum. Sögur þessar nutu mikilla vinsælda á þessum árum og voru ófáanlegar í áratugi eða þar til bróðursonur hans, Finnur Eiríksson, gaf þær út aftur árið 2005 ásamt bókinni Átta sögur sem inniheldur smásögur eftir Steingrím en þær höfðu ekki verið gefnar út áður í einni heild. Þessar sögur skrifaði Steingrímur undir skáldanafninu Valur Vestan. Einnig skrifaði Steingrímur barnabókina Blíð varstu bernskutíð og rifjaði þar upp bernskutíð sína á skemmtilegan máta.
Eiginkona Steingríms var Guðrún Þórarinsdóttir. Eignuðust þau átta börn, en tvö létust nýfædd. Guðrún lést um aldur fram 1959 og var Steingrími og börnunum mikill harmdauði.
Nokkru eftir lát Guðrúnar tók Steingrímur sig upp og flutti frá Patreksfirði til Reykjavíkur og var þar nokkurn tíma sem og í Hafnarfirði. Nam hann á þessum árum hjá Páli Ísólfssyni og Páli Kr. Pálssyni tónfræði og útsetningar.
Hann var síðar organisti á Fáskrúðsfirði og svo síðast skólastjóri Tónlistaskóla Húsavíkur og var hann einnig organisti við Húsavíkurkirkju.
Eftir Steingrím liggur fjöldi af lögum og tónverkum sem hann samdi á ferli sínum. Mörg þessara laga eru þjóðkunn og eru leikin og sungin við ýmis tækifæri. Einnig samdi og útsetti Steingrímur marga sálma og kirkjutónlist sem mikið er spiluð og sungin. Hann samdi og útsetti mörg söng- og kórlög og hafa margir kórar flutt lög hans og texta. Þekkt eru einnig nokkur danslög og unnu einhver þeirra til verðlauna í danslagakeppni SKT.
Steingrímur lést 20. apríl 1976. Var hann jarðsettur í Prestbakkakirkjugarði í Hrútafirði.

 

Útgefnar bækur:

 
Ágúst 2005 Út er komin bókin Átta sögur, eftir Val Vestan. Í bókinni eru 8 sögur, sem skrifaðar voru á árunum 1950 -60. Sögurnar birtust í ýmsum tímaritum þess tíma en hafa aldrei verið gefnar út áður sem ein heild. Bókin, Átta sögur, ásamt öðrum bókum Vals Vestan eru eingöngu fáanlegar hjá FRUM. Þeir sem áhuga hafa á að eignast bækurnar, hafi samband í síma 568 1000 eða sendið póst á frum(hja)frum.is 
Júní 2005 Týndi hellirinn er fyrsta spennu - og skemmtisagan sem Valur Vestan sendi frá sér. Í bókinni segir frá Krumma,  jarðfræðingi og grúskara og félaga hans Tóka. Á ferðalagi vestur á fjörðum verða þeir varir þýskra njósnara, sem kemur af stað óvæntri atburðarás. Þeir félagar þurfa svo sannarlega á styrk sínum og þreki að halda í byssubardaga við káfbát. Einnig leysa þeir gamla gátu um helli sem sagnir sögðu að væri til. Sagan gerist á seinni stríðsár unum og lýsir vel tíðaranda á Íslandi þegar breskir hermenn voru hér, stríðið í algleymingi og mikil spenna á milli manna og þjóða þar sem enginn vissi hverjum mátti treysta.
Flóttinn frá París er önnur spennu- og skemmtisagan sem Valur Vestan sendi frá sér. Gerist sagan að mestu í London og París er aðalpersóna sögunnar, Krummi, freistar þess að frelsa stúlku, sem hann ann, úr klóm nasista í París. Hann lendir í æsilegum flótta eftir að hafa gert mikinn usla í herbúðum nasista sem hugsa honum þegjandi þörfina. Mörgum finnst sagan tímamótasaga íslenskra spennusagnahöfunda þar sem aðalpersónan glímir við mjög flókin úrlausnarefni. 
Rafmagnsmorðið fjallar um flókið morðmál þar sem ung stúlka finnst látin í íbúð í Reykjavík. Í fyrstu er álitið að um slys sé að ræða en Krummi, sem er jarðfræðingur og grúskari, áttar sig á að kaldrifjaður morðingi hefur verið að verki. Saklaus maður liggur undir grun og krefst rannsókn málsins nákvæmni og færni. Sagan er um tilfinningar; ást, hatur og öfund. Mannlegur breyskleiki er afhjúpaður. Hið góða og illa takast á en styrkur og fegurð ástarinnar ljómar í sinni fegurstu mynd. Sagan er afar spennandi og lesandi finnur til með bæði saklausum og sekum.